الإخبارية اللبنانية

أخبار لبنان والعالم

أخبار سياسية - محلية وعالمية

سعيد ياسين للسعوديّة: نحن منكم وانتم منّا شئنا أم أبينا وشئتم أم أبيتم

سعيد ياسين للسعوديّة: نحن منكم وانتم منّا شئنا أم أبينا وشئتم أم أبيتم

نظم مناصرو تيار المستقبل تجمعا امام منسقية البقاع للاعتراض والتصدي لقرار الرئيس سعد رفيق الحريري بالعزوف عن المشاركة في الانتخابات النيابية .
وانتهى التجمع بعد رفع شعارات مؤيدة للتيار بالتوجه الى بيت الوسط ل لايصال الصوت المعترض والغاضب لهذه الخطوة مع التأكيد على خطورة هذا القرار على الصعيد الوطني والميثاقية الوطنية في هذا الظرف الصعب والدقيق الذي تمر به البلاد
وبالمناسبة القى مسؤول تيار المستقبل في البقاع الاوسط سعيد ياسين كلمة: قال فيها جئنا لنتحدى الظروف والطقس القاسي للتحرك باتجاه بيروت وعالطرقات لنسال لوين رايحين.

الكلمة بإسم الجميع لسعد رفيق الحريري:

دولة الرئيس بغضّ النظر عن كل الظروف والمعطيات التي عندك، القرار الي أخدتو أو راح تاخدو غلط.
قرار ترك الساحة خاطئ.
قرارك بالعزوف غير موفّق.

دولة الرئيس، بهالمسيرة مرقت ومرقت هالناس معك بكتير صعوبات. ولا مرّة أهلك وناسك إلّا ما واجهوا وكانو قدّ المواجهة.

أنت قدّرت الظروف وأخدت القرار الي برأيك ورأي مستشارينك هوي الصح.

والناس قدّرت الظروف وبرأيها إنو قرارك انت ومستشارينك غلط.

هيدي الناس يا دولة الرئيس مش راح تترك.
هيدي الناس راح بتكمّل.
عا دعسات رفيق الحريري راح بتكمّل.
حفاظاً على لبنان وعروبة لبنان راح بتكمّل.

وللقريب والبعيد، وللحليف والخصم المعلن والخفي هالناس بتقول:

– أوعى حدا يفكّر إن الساحة السنيّة أرض مشاع.

– أوعى حدا يفكّر إنو السنّة بينكسروا.

– أوعى حدا يفكّر إنّو يعمشق عا ضهر هالسنّة.

واذا سعد الحريري عزف عن خوض الإستحقاق، السنّة موجودين، ومانهم ساحة لحليف مقنّع أو غيّور مصطنع ليسرحوا ويمرحوت فيها.

راح نسمع مزاودين ومعمشقين وحالمين وطامحين وطامعين كتير..

هودي كلهم كغثاء السيل…
ما تهكلوا همّ.
إنتو ملح الأرض، وإنتو ميزان البلد، وإنتو صمّام أمانو…

ورانا بحر كبير من شرق الدنيا لغربها…

وكلمة من القلب للمملكة العربيّة السعوديّة، ولخادم الحرمين الشريفين وولي عهده سمو الأمير محمّد بن سلمان:

اللبنانيّون العرب منكم وأنتم منهم.. شئنا أم أبينا، وشئتم أم أبيتم.
وتبقى مكّة قبلتنا الدينيّة، والرياض قبلتنا السياسيّة. رغم أنف الحاقدين.

وعلى بركة الله نقول:
نحن جمهور رفيق الحريري لبنان وطننا والعروبة هويّتنا، ولن نرضى غيرها هويّة لهذا البلد مهما كلّف الثمن.

error: !!