محمد عوّاد : اللي بيجمعنا كلنا اليوم صورة زوجة وأبناء باسكال سليمان

كتب الصحافي ومسؤول العلاقات العامة في حزب إئتلاف الديمقراطيين اللبنانيين والعضو المؤسس في منظمة SOUL في واشنطن محمد عواد

ما في أسهل من الفوضى وما في أسهل من الفتنة والتحريض
لكن الحِفاظ عالبلد وما بقي من مؤسسات دولة هوّ الصعب وهيدا هوّ التحدي الحقيقي، في مواقف حقيقيّة ووطنيّة ما منقدر إلاّ ما نثني عليها وهيي مواقف المسؤولين بحزب القوات اللبنانية يوم أمس بجبيل والإتصالات اللي بقيت متواصلة هاليومين لتخفيف الإحتقان بالمنطقة، أمّا الموقف الشيعي الجبيلي من الحادثة كان مستنكر للتعرّض والخطف والقتل بحق أيّ إنسان وهيدا الأمر تجلّى عبر الإتصالات واللقاءات اللي بعدها مُستمرّة وبيانات أبناء المنطقة.
اللي بيجمعنا كلنا اليوم صورة زوجة وأبناء باسكال سليمان اللي حتبقى صورتهم برأسنا مرتبطة بأخر كلمات قالها باسكال “مش برأسي عندي اولاد”.
دماء باسكال حتتعمّد فيهم منطقة جبيل ولبنان بكامله ونبقى مُصرّين أكثر وعزيمتنا أكبر نحو التشبّث بمؤسسات الدولة وضبط الحدود وقوننة أيّ وُجود أجنبي على أرض بلدنا.
أمّا اللي بعاد عن منطقتنا جبيل وعم يكتبوا ويحرّضوا من جميع الجهات هيدول ما بيعرفوا شو يعني علمات وقرطبا وأهمج وفرحت والحصون وشو بتعني بجّة لعلمات وعلمات شو بتعني لقرطبا، دماء باسكال ودموع عائلته وأصدقائه حمل كبير عكتافنا كلنا ما رح نسمح يروحوا بلا الحقيقة والعقاب.